曼城與阿仙奴今晚正面交鋒，上演今季英超最關鍵一戰。呢場榜首大戰被英國傳媒形容為「冠軍分水嶺」，目前阿仙奴領先曼城6分，但「藍月」仍手握一場補賽，令今場對決嘅重要性進一步提升。曼城領隊哥迪奧拿賽前更直言，此戰「等同決賽」，若未能全取3分肯定會影響爭標。文:謝德謙

中場爭奪最關鍵
曼城近期狀態回升，包括喺英格蘭聯賽盃決賽擊敗阿仙奴，以及聯賽大勝車路士，士氣正盛。哥帥認為今仗除咗戰術部署，臨場心態亦係勝負關鍵。坐擁主場之利，「藍月亮」預料會以高位逼搶配合快速傳送，持續向對手防線施壓。

阿仙奴目前受傷兵問題困擾，攻守平衡難免構成影響，今仗關鍵好大機會落喺中場控制權之爭。若曼城成功壓制阿仙奴中場，將更易掌控戰局；反之，若「兵工廠」能穩守之餘，再把握反擊機會，隨時有力搶走關鍵分數。